Цөөн үгээр
  • Шинэчлэгдэж буй цахим хуудасны талаархи саналаа өгөөрэй.
Байгууллагын ажлын байран дээр тавигдах стандарт

АЖЛЫН БАЙРАН ДЭЭР ТАВИГДАХ БАЙГУУЛЛАГЫН СТАНДАРТ

 

                                                       1.Зорилго
 

 1.1. Энэхүү стандартын зорилго нь: Орон нутгийн өмчийн газрын /цаашид “байгууллага” гэх/ албан хаагчид  Монгол Улсын хууль тогтоомж, төрийн албаны зарчим, ёс зүйн хэм хэмжээг сахин биелүүлж төрийн үйлчилгээний чанарыг сайжруулахад оршино.


                                                              2. Хамрах хүрээ

            2.1. Энэхүү стандартыг Байгууллагын хэмжээнд бүх албан хаагчид дагаж мөрдөх бөгөөд 7.10, дахь заалт нь байгууллагын нийт албан хаагчдад хамаарна.

                                                          3. Нэр томъёо, тодорхойлолт


            Байгууллагын стандарт, түүний үзүүлэлт, төрийн албан хаагчийн үйл ажиллагаандаа баримтлах зарчим, хувцаслалт, соёл, гадаад төрх, үйлчлүүлэгчтэй харилцах харилцаа болон тэдний ажлын байранд тавих шаардлага, зэргийг тусган эрх бүхий байгууллага, албан тушаалтнаар баталгаажуулсан баримт бичиг.

                                   4. Албан хаагчийн үйл ажиллагаандаа баримтлах үндсэн зарчим

 

4.1. Албан хаагч нь үйлчлүүлэгчдийн сэтгэл ханамжит байдалд анхаарлаа хандуулан, үйлчлүүлсэн иргэн бүрд таатай сэтгэгдэл төрүүлэхийг эрхэмлэн ажиллана.

4.2. “Төрийн үйлчилгээг танд” гэсэн уриаг үйлчилгээ, үйл ажиллагаандаа мөрдлөг болгон ажиллана.

4.3. “Албан хаагч” нь байгууллагын бусад үйлчилгээний талаар зохих мэдлэгтэй байж, байгууллагын үйлчилгээ, үйл ажиллагааны талаар шинэ мэдээ, мэдээллийг цаг тухайд нь авч, өөрийгөө ямагт хөгжүүлж, ур чадвараа байнга дээшлүүлж ажиллана.

 

5. Ажлын байранд тавих шаардлага:

 

5.1.  Ажлын байр нь иргэд үйлчилгээ авах нөхцөл,шаардлагыг хангасан байна.

5.2.  Мэдээллийн самбарт байгууллагын танилцуулга, гарын авлага шаардлагатай мэдээ

мэдээллийг хэвлэмэл байдлаар тавьсан байна.

5.3   Албан хаагч ажил эхлэхээс 15 минутын өмнө ирж, өөрийн ажлын байр, техник хэрэгслийн бэлэн байдлыг бүрэн хангана.


           6. Албан хаагчид тавигдах шаардлага:

 

6.1 Албан хаагч үйлчлүүлэгчтэй харилцах харьцааны соёлыг эзэмшсэн, Өмч, худалдан авах  ажиллагааны дадлага туршлагатай ажилтан байна.

6.2 Эмэгтэй ажилтны гадаад төрх

6.2.1 Хумсны засалт, будалт нь хурц тод содон биш энгийн даруухан байх ба үсээ хойш самнаж  ардаа шууж боосон байна.

6.2.2   Хэт том, тод өнгийн ээмэг, бөгж, зүүлт хавчаар, бугуйвч гэх мэт гоёл чимэглэлийн зүйлсийг /ажлын цагаар/ хэрэглэхийг хориглоно.

6.2.3 Нүдний шил /контакт линз/ өнгөгүй тунгалаг байна. Гоёлын болон нарны шил зүүхийг хориглоно. /Энэхүү заалт эрэгтэй ажилтанд мөн адил хамаарна/

6.2.4 Үсийг тод өнгөөр будах, хэт этгээд байдлаар засуулахыг хориглоно.

6.3 Эрэгтэй ажилтны гадаад төрх

       6.3.1 Эрэгтэй ажилтан ээмэг зүүх, үсээ тод өнгөөр будах хэт этгээд байдлаар засуулах, хэт  ургуулах, мөн урт сахал тавихыг хориглоно.

       6.3.2 Үйлчлүүлэгчид харагдахуйц биеийн ил хэсэгт шивээсгүй байна. /Энэхүү заалт эмэгтэй ажилтанд мөн адил хамаарна/

 6.4 Албан хаагчийн хувцаслалт
6.4.1 Албан хаагчид энгийн даруухан, ажил хэрэгч, цэвэрхэн хувцасласан байна.

6.4.2 Эрэгтэй албан хаагчид костюм пиджак, эмэгтэй албан хаагчид юбка пиджак өмсөнө.

7. Албан хаагч үйлчлүүлэгчтэй харилцах харилцаанд тавих шаардлага:

 

7.1 Үйлчлүүлэгчийн өөдөөс харж сонсогдохоор тод, хүндэтгэлийн зөв үг хэллэгийг тухайн нөхцөл байдалд тохируулан хэрэглэж харьцана.

7.2 Үйлчлүүлэгчтэй тухайн нөхцөл байдалд тохируулж мэндэлнэ. Үйлчлүүлэгчид таатай сэтгэгдэл төрүүлэхийн тулд байнга “”ИНЭЭМСЭГЛЭЖ” харилцана. ЖИШЭЭ 1: ”Өглөөний мэнд хүргэе”, ”Өдрийн мэнд хүргэе”, ”Сайн байна уу? Та”, ”Танд юугаар туслах вэ?” гэх хэллэгийг хэрэглэнэ.

7.3 Үйлчлүүлэгчтэй мэндэлсний дараа соёлтой хэллэгээр харилцаагаа эхэлнэ.
ЖИШЭЭ 2: ”Танд юугаар туслах вэ?” гэх мэт

7.4 Үйлчлүүлэгчийн хүсэлтийг анхааралтай сонсох бөгөөд ярилцаж байх үедээ өөр зүйлд анхаарлаа хандуулахгүй байвал зохино.

7.5 Үйлчлүүлэгчээс тодотгох, лавлах, давтан асуухдаа ”УУЧЛААРАЙ” гэдэг үгийг ямагт хэрэглэнэ.

7.6 Үйлчлүүлэгчээс түр холдох юм уу, хүлээлгэхдээ “Уучлаарай, түр хүлээнэ үү…….. /холдох болсон шалтгаанаа тодорхой хэлэх/”, өөрөө шийдэж чадахгүй асуудал гарвал: ”Уучлаарай, одоохон тодруулаад өгье. Та түр хүлээнэ үү.” гэх мэтийн хэллэгийг хэрэглэнэ.

7.7 Өөр албан хаагч, үйлчилгээний ажилтанд ажлаа шилжүүлж байгаа бол Одоо танд ………… /албан тушаал/…………../нэр/ үйлчлэх болно гэх мэт хэллэгийг хэрэглэнэ.

7.8 Өөрсдийн үйл ажиллагааны буруугаас болж үйлчлүүлэгчээс зайлшгүй уучлалт гуйх бол ”Уучлаарай, миний /бидний, манай ажилтны/ буруу” гэх мэт хэллэг хэлж, зөвөөр ойлгуулна.

7.9 Үйлчлүүлэгчтэй харилцаагаа соёлтой зөв үг хэллэгээр төгсгөнө. ЖИШЭЭ 3: “Баяртай” гэх мэт.

7.10 Үйлчлүүлэгчтэй утсаар харилцах харилцаа:

7.10.1 Албан хаагчид нь үйлчлүүлэгчтэй утсаар харилцахдаа   харилцуурын нөгөө үзүүрт байгаа хүнд ойлгомжтойгоор дараах үг хэллэгийг хэлж хэвшсэн байна. Үүнд:

7.10.2 Орон нутгийн өмчийн газрын ………./албан тушаал, нэр/ байна ”Таныг сонсож байна, танд юугаар туслах вэ?” гэж яриагаа эхлэх;

7.10.3 Харилцуурыг авсан ажилтнаас өөр хүнтэй ярих бол ”Та түр хүлээнэ үү” гэж хэлээд дуудаж яриулах буюу тухайн хүнтэй холбогдох утасны дугаарыг хэлэх;

7.10.4 Тухайн хүн байхгүй бол ”Уучлаарай …… одоогоор байхгүй байна, дотуур эсвэл гадуур ажилтай явж байна” гэх мэтээр хариулах;

7.10.5 Хэрэв зохих үйлчилгээ, хүсэлтийг биелүүлж чадаагүй эсвэл асуултад хариулах боломжгүй, тухайн хариуцсан ажилтан байхгүй тохиолдолд:
          • Утсаар ярьсан хүний овог нэр
          • Эргэж холбоо барих утас
          • Гол утга санаа
          • Утсаар ярьсан огноо, цаг зэргийг тэмдэглэнэ.

7.10.6 Ярианы төгсгөлд “баярлалаа, баяртай” гэх талархлын үг хэлж, харилцагч утсаа тасалсны дараа харилцуурыг тавина.

8. Үйлчилгээний үед хориглох үйлдлүүд

                Албан хаагчид дараах үйлдлүүдийг хориглоно. Үүнд:

8.1 Үйлчлүүлэгчийн дэргэд хувийн асуудал ярих, хэт чанга ярих, чанга инээх, орилох, бүдүүлэг үг хэллэг хэрэглэх, мэргэжлийн үг хэллэг хэт их хэрэглэх, маргалдах, гараа халаасандаа хийх, хөлөө ачиж суух зэргийн зохисгүй үйлдлүүд гаргах;

8.2 Үйлчлүүлэгчийг ялгаварлан гадуурхах, гадаад үзэмж, албан тушаал нэр хүнд, яс үндэс, хүйс, арьсны өнгө, боловсрол, мэргэжил гэх мэт /түүний талаар эвгүй, таалaмжгүй үг хэллэг хэрэглэх, халзан, намхан, хөгшин гэх мэт;/

8.3 Үйлчлүүлэгчтэй харилцахдаа өөр тийшээ харах, анзаараагүй, сонсоогүй дүр эсгэх, удаан хүлээлгэх, загнах, доромжлох;

8.4 Үйлчлүүлэгчийн нүүр царай, эд хөрөнгө бусад зүйлд хэт анхаарах, тийм яриа дэлгэх, хувийн чанартай юм асуух.

                                     9. Хяналт, хариуцлага, урамшуулал

9.1 Энэхүү стандартыг байгууллагын албан хаагчид чанд мөрдөн ажиллана. Албан хаагчид энэхүү стандартын хэрэгжилтийн талаар хагас, бүтэн жилийн тайландаа тусгаж байгууллагын даргад тайлагнана.

9.2 Стандартын биелэлтэд албаны дарга, ахлах мэргэжилтэн өдөр тутмын, Газрын дарга ерөнхий хяналтыг тавина.

9.3 Энэхүү стандартыг зөрчсөн ажилтанд дараах арга хэмжээг авна Үүнд:

9.3.1 Эхний удаа бичгээр сануулга өгөх;

9.3.2 Ажилтан стандартыг хоёр удаа зөрчиж сануулга авсан тохиолдолд байгууллагын Ёс зүйн   хорооны хурлаар хэлэлцүүлж, холбогдох шийдвэрийг гарган хэрэгжүүлнэ.

9.3.3 Ажилтан стандартыг 3 болон түүнээс дээш давтан зөрчсөн тохиолдолд Орон нутгийн өмчийн газрын даргын шийдвэрээр хуульд заасан сахилгын шийтгэл ногдуулна.

9.3.4 Энэхүү стандартыг удаа дараа зөрчсөн үйлдэл нь албан үүргээ биелүүлээгүй гэж үзэх үндэслэл болно.

9.3.5 Байгууллагын үйлчилгээг стандартын дагуу үйлчлүүлэгчдэд чанартай хүргэж байгаа ажилтныг холбогдох журмын дагуу шагнаж урамшуулна.

НИЙТЭЛСЭН: 2017-12-15 11:11:11