Цагаанчулуут сум “Төлчин, саальчин эмэгтэйчүүдийн чуулган”, “Ажлын амт” үзэсгэлэн худалдааг тус тус зохион байгуулж 80 гаруй төлөөлөл оролцлоо. Энэ үеэр сумын удирдлагууд цаг үеийн мэдээлэл өгч, малын эрүүл мэнд,  эмийн зохистой хэрэглээ, цаг агаарын төлөв, хүүхэдтэйгээ харилцах арга зүй, гэр бүлийн аз жаргал сэдвээр илтгэл тавьж, төлчин, саальчин эмэгтэйчүүдийнхээ санал хүсэлтийг сонслоо. “Ажлын амт” үзэсгэлэн худалдаанд 23 иргэн 17 нэр төрлийн бүтээгдэхүүнээр оролцож “Хамгийн олон нэр төрлийн бүтээгдэхүүн хийсэн оролцогч”, “Хамгийн цэвэр, үзэмжтэй идээтэй оролцогч”, “Хамгийн шинэлэг санаа дэвшүүлсэн оролцогч”, “Хамгийн их борлуулалт хийсэн оролцогч”-ийг тус тус шалгаруулж шагнаж урамшууллаа. Өрхийн үйлдвэрлэл эрхлэгч бүсгүйчүүд баяжуулсан хайлмаг, молоко, шар сүүний ундаа, цэлцэгнүүр, айрагны шар тос, айрагны тосны хайлмаг, нэрстэй тараг зэргийг шинээр санаачилан хийж,  сав, баглаа бодлоо ч эрүүл ахуйн шаардлага хангах түвшинд хийснээрээ онцлог байв.