Цөөн үгээр
  • Шинэчлэгдэж буй цахим хуудасны талаархи саналаа өгөөрэй.
МОНГОЛ УЛСЫН ИХ ХУРЛЫН ЁС ЗҮЙ, САХИЛГА, ХАРИУЦЛАГЫН БАЙНГЫН ХОРОО, ТӨРИЙН АЛБАНЫ ЗӨВЛӨЛӨӨС ЁС ЗҮЙН ЗӨВЛӨЛИЙН ГИШҮҮД, ХҮНИЙ НӨӨЦИЙН МЭРГЭЖИЛТНҮҮДИЙГ ЧАДАВХЖУУЛАХ СУРГАЛТЫГ ЗОХИОН БАЙГУУЛЖ БАЙНА

Чадахуйн зарчимд суурилсан, цогц чадамжтай, ёс зүйтэй төрийн албыг бэхжүүлэх нь Төрийн албаны шинэтгэлийн үндсэн зорилго юм. Канад улсын Засгийн газрын дэмжлэгтэйгээр Монгол Улсын Төрийн албаны зөвлөл НҮБ-ын Хөгжлийн хөтөлбөртэй хамтран “Монгол Улсад мэргэжлийн, иргэн төвтэй төрийн албыг төлөвшүүлэх нь” төслийг хэрэгжүүлж, ёс зүйтэй төрийн албыг төлөвшүүлэх чиглэлээр тодорхой ажлуудыг олон талын оролцоотойгоор зохион байгуулж байна. 

 

Энэ хүрээнд орон нутаг дахь төрийн байгууллагуудын дэргэдэх Ёс зүйн зөвлөлийн гишүүд болон хүний нөөцийн мэргэжилтнүүдэд зориулсан “Цогц чадамжийг нэвтрүүлэх нь-Ёс зүйн зөвлөлийг бэхжүүлэх, хүний нөөцийн мэргэжилтнийг чадавхжуулах” сэдэвт сургалтыг Завхан аймагт эхлүүллээ.

Төрийн албаны дэргэдэх Ёс зүйн зөвлөл болон хүний нөөцийн мэргэжилтнүүдийг ёс зүйн зөрчлөөс урьдчилан сэргийлэх арга зүй болон төрийн албан хаагчийн цогц чадамжийг олж илрүүлэх, үнэлэх, хөгжүүлэх арга зүй, ур чадварыг олгох зорилготой энэхүү сургалтад 11 сарын 8, 9-ний өдрүүдэд Завхан аймгийн 24 сумаас 100 орчим төлөөлөл оролцож байна. Сургалтын баг 11 сарын 10-ны өдөр Цагаанхайрхан суманд ажиллана. Харин бүсчилсэн сургалтыг 11 сарын 11, 12-ны өдрүүдэд зохион байгуулж, Завхан, Увс, Ховд, Говь-Алтай, Баян-Өлгий аймгийн төрийн байгууллагуудын Ёс зүйн зөвлөлийн гишүүд, Төрийн албаны салбар зөвлөлийн гишүүд, хүний нөөцийн асуудал  хариуцсан мэргэжилтнүүд оролцох юм.

 

Сургалтыг багаар ажиллах, хамтдаа мэдлэг бүтээх, мэдлэг, туршлагаа хуваалцах, тохиолдол шинжлэх судлах, хэлэлцэх зэрэг оролцогч төвтэй, өөрийн удирдлагатай суралцах арга зүйгээр удирдан явуулж байгаагаараа онцлогтой.

Оролцогчид сэтгэлгээний  өөрчлөлт болон танин мэдэхүйн өрөөсгөл хандлагын талаар тодорхой ойлголттой болж хандлагаа эргэцүүлэхээс гадна ёс зүйн зөрчлийг үүсгэх хүчин зүйлийг тодорхойлох мэдлэг, ур чадвартай болох юм. Мөн төрийн албан хаагчийн цогц чадамжийн ойлголт, цогц чадамжийг нэвтрүүлснээр бий болох үр нөлөө, ач холбогдлыг таниулах, чадахуйн зарчмыг хамгаалах, ёс зүйтэй төрийн бодлогыг хэрэгжүүлэх, ёс зүйн зөрчлөөс сэргийлэхэд ашиглах шинэ мэдлэг, инновацийн ур чадварыг эзэмшинэ.

 

Бүсчилсэн сургалтыг Завхан, Өвөрхангай, Сэлэнгэ, Дорнод аймгуудад 11 сарын 8-30-ны өдрүүдэд зохион байгуулна.

 

 

Канад улсын Засгийн газрын дэмжлэгтэй

НИЙТЭЛСЭН: 2021-11-09 16:26:11