12 дугаар сарын 3 буюу Хөгжлийн бэрхшээлтэй иргэдийн эрхийг хамгаалах өдрийг тохиолдуулан аймгийн ЗДТГ-ын Нэг цонхны үйлчилгээний төв, Хатансэмбэрүү ТББ-ын Сэмбэрүү сургалт хөгжлийн төв хамтран “Мэдээлэл авах хэрэгцээ” сэдвээр хөгжлийн бэрхшээлтэй иргэдийн дунд хэлэлцүүлэг зохион байгууллаа.

Тус хэлэлцүүлэгт Хатансэмбэрүү ТББ-аас зохион явуулсан амьдрах ухааны сургалтуудад хамрагдсан иргэд болон аймгийн ЗДТГ-ын “Нэг цонхны үйлчилгээний төв”, Нийгмийн халамж үйлчилгээний хэлтэс, Хөдөлмөрийн хэлтэс,  Хатансэмбэрүү ТББ-ын төлөөлөл оролцсон байна.

Хөгжлийн бэрхшээлтэй иргэдэд чиглэсэн үйлчилгээний талаар Д.Мөнхбат /Нэг цонх/, С.Сарантуяа /НХҮХ/, Б.Алтанзул /НХҮХ/, Ж.Доржханд /ХХ/, Б.Алтангадас /ХХ/ нар, Олон нийтийн оролцоонд түшиглэсэн халамжийн үйлчилгээний сургалтын төслийн танилцуулгыг В.Бадамрагчаа /Хатансэмбэрүү ТББ/ нар мэдээллэж иргэдийн асуултад хариулт өглөө.

Иргэд мэргэжлийн баримжаа олгох сургалтад хамрагдах, нэг сая нэг ажлын байр төсөлд хэрхэн хамрагдах, ХБИ-ийг тогтмол эмчилгээнд хамруулах эмнэлэг байдаггүй тул эмчлүүлэх ямар боломж байгаа талаар, ХБ-тэй хүүхэд, иргэнийг асарч буй хүмүүсийн нийгмийн асуудлыг шийдвэрлэх ямар боломж байгаа талаар, эмнэлэгт үзүүлэхэд дараалал ихтэй байгаа талаар, ХБИ-ний үнэмлэхээр нийтийн тээврээр үнэ төлбөргүй үйлчлэх боломжгүй байгаа талаар, ХБХ-ийн эцэг эхчүүд ХЭДС-ийн төсөлд хамрагдаж болох эсэх, ХБИ-д ажилд ороход хүндрэлтэй байгаа талаар олон асуулт тавьж, саналаа хэллээ.

Хэлэлцүүлгээс:

• мэдээллийг түргэн хугацаанд хүлээн авах боломж хомс,
• чөлөөт цагаа зөв боловсон өнгөрүүлэх хөгжлийн танхимгүй,
• нөхөн сэргээх төв байхгүй,
• сэтгэлзүйн зөвөлгөө өгөх газар дутагдалтай, 
• хөгжлийн бэрхшээлтэй хүүхэд, иргэнийг асарч буй хүмүүсийг нийгэмшүүлэх ажил дутагдаж байна гэсэн дүгнэлт гаргажээ.

Иргэд боловсролын болон сэтгэл засал, согог засал, сувилахуйн цогц үйлчилгээ хүргэх, нийгэмшүүлэх хөгжлийн ордон байгуулж өгөх хүсэлтийг орон нутгийн удирдлага болон Засгийн газарт уламжлаж өгөхийг зохион байгуулагчдаас хүслээ.