Шинэ төрлийн коронавирус дэлхий даяар хурдацтай тархаж, хөл хорио тогтоосон энэ үед бизнес эрхлэгчид, ард иргэдэд тулгамдаж буй чухал асуудал бол банкны зээл юм. Иймд өнөөдөр аймгийн Засаг дарга Д.Батсайхан Завхан аймагт үйл ажиллагаа явуулж буй ХААН банк, Төрийн банк, ХАС банкны удирдлагуудыг хүлээн авч уулзахдаа: “Улсын Онцгой комисс, аймгийн Онцгой комиссын шийдвэрээр зарим газруудын үйл ажиллагааг зогсоох, ажиллах хугацааг хязгаарлах шийдвэр гарч байх үед Завхан аймаг бизнес эрхлэгчдэдээ учирч буй эрсдэлийг бууруулах зорилгоор зээл хүүгийн төлбөрийг хойшлуулах, зээлийн хүүг зогсоох, нэмэгдүүлсэн хүү, шимтгэлээс чөлөөлөх зэрэг асуудлаар Санхүүгийн бодлогын зөвлөл, Монгол банк, Санхүүгийн зохицуулах хороо, Сангийн яаманд 2020 оны хоёрдугаар сарын 26-ны өдөр санал хүргүүлж байсан. Банкуудын зүгээс иргэд, харилцагчдадаа хөнгөлөлт үзүүлэх, зээлийн шимтгэл бууруулах, хугацаа сунгах тухай асуудал олон хоног яригдаж, өчигдөрөөс төв банкууд тань тодорхой шийдлүүд гаргаж байгаатай холбогдуулан өнөөдөр та бүхэнтэй уулзаж байна” гээд дараах чиглэлүүдийг өглөө.

 

1. Онцгой комиссын шийдвэрээр үйл ажиллагаа нь зогссон, цагийн хязгаарлалтад орсон, коронавирусийн нөхцөл байдлын улмаас орлого нь буурсан, бизнес эрхлэгчдийн зээлийн хугацааг сунгах, шимтгэлээс чөлөөлөх ажлыг шуурхай зохион байгуулах
2. Хэрэглээний зээлийн нөхцөлийг уян хатан болгож, өрхийн цэвэр орлогын бууралтыг харгалзан зээлийн хугацааг сунгах, нэмэгдүүлсэн хүү, шимтгэлээс чөлөөлөх
3. Малчны зээлд онцгойлон анхаарал хандуулж, зээлийн эргэн төлөлтийн хугацааг сунгах, энэ оны 4, 5 дугаар саруудын төлбөрийг 10, 11 дүгээр саруудад шилжүүлж, зээл төлөх хугацааг хойшлуулах
4. Харилцагч бүрээ сонсож, тэдний өмнө тулгамдаж буй асуудлуудыг шийдвэрлэж дэмжлэг үзүүлэх
5. Хугацаа хэтэрсэн зээлдэгчидтэй харилцан тохиролцож, нэмэлт гэрээ байгуулах замаар төлбөрийн нөхцөлийг хөнгөвчилж, уян хатан нөхцөлөөр зээлийн төлбөр барагдуулах боломжийг олгох
6. Хэрэглэгч аймгаас үйлдвэрлэгч аймагт шилжих зорилтын хүрээнд үйл ажиллагаагаа эхлүүлээд удаагүй байгаа бизнесийн бүлгүүдэд санхүүгийн зөвлөх үйлчилгээ, эргэлтийн хөрөнгийн дэмжлэг үзүүлж үйл ажиллагаагаа өргөжүүлэхэд нь туслах
7. Шийдвэр гаргах түвшний зарим эрх мэдлийг суманд буюу анхан шатны нэгж рүү шилжүүлэх замаар ард иргэдэд чирэгдэлгүй, шуурхай үйлчлэх
8. Бүх төрлийн зээлийн эргэн төлөлтийн уян хатан нөхцөлийг бий болгох тухай шийдвэрийг богино хугацаанд гаргаж, хүү, шимтгэлийг бууруулах, бүрдүүлэх бичиг баримтыг багастгаж харилцагчдадаа илүү таатай нөхцөлийг бүрдүүлэхэд онцгой анхаарч ажиллахыг чиглэл болгов.

Цаашид орон нутгийн үйлдвэрлэлээ тогтвортой явуулах, бизнес эрхлэгчдээ дэмжихэд аймгийн зүгээс анхаарал хандуулж, орон нутагт үйл ажиллагаагаа явуулж буй банкуудтайгаа бүхий л талаар хамтран ажиллахад бэлэн байгаагаа аймгийн Засаг дарга энэ үеэр илэрхийллээ.  

 

Банкны удирдлагууд хэлэхдээ: “Аймгийн Засаг дарга ард иргэд, харилцагчдын төлөө сэтгэл гаргаж биднийг хүлээн авч уулзсанд талархал илэрхийлье. Таны өгч буй чиглэлүүдийг бид аль болох богино хугацаанд хэрэгжүүлж ажиллах болно” гэлээ.