Өнөөдөр /2021-06-28/ аймгийн Засаг дарга Д.Түвшинжаргал Нэгдсэн эмнэлэгт ойрын  түргэн тусламжийн тусгай зориулалтын бүрэн тоноглогдсон “Старикс” маркийн хоёр автомашин хүлээлгэн өглөө. Аймгийн Нэгдсэн эмнэлгийн дарга Г.Цогзолмаа хэлэхдээ: “УАЗ-469 машинаар дуудлагад явж, хэвтрийн өвчтөн тээвэрлэхэд  хүнд байлаа. Одоо машин дотроо хүчилтөрөгчөө өгч, амилуулах суурь тусламжаа үзүүлэх боломж бүрдлээ. Эрүүл мэндийн салбар, эмч ажилчдын өмнө тулгарч буй асуудлыг удаа дараа шийдэж буй аймгийн Засаг дарга Д.Түвшинжаргал танд баярлалаа” гэв.

Мөн гэмт хэрэгтэй тэмцэх, зам тээврийн осол хэргээс урьдчилан сэргийлэх, цагдаагийн алба хаагчдын ажиллах нөхцөл бололцоог сайжруулах зорилгоор улсын чанартай авто зам дагуух хяналтын цэг, төв суурин газрын хөдөлгөөнт эргүүлд зориулан дөрвөн тээврийн хэрэгсэл, хурд хэмжигч гурван ширхэг, нийтийг хамарсан арга хэмжээний үед өргөн зурвасыг хамгаалалтад авахад ашиглах 100 ширхэг хамгаалалтын хайс хүлээлгэн өгөв.