Бэлчээрийн малын ашиг шимийг богино хугацаанд сайжруулахын тулд тухайн бүс нутагт зохицсон үүлдэр, омгийн стандартын шаардлага хангасан хээлтэгч, хээлтүүлэгчийг үржилд ашигладаг. Энэ ажлын үндсэн суурь нь малын үзлэг, ангилалт байдаг. Тэгвэл Завхан аймаг мал зүйчдээ бог, бод малын ангилагч-шинжээчээр мэргэшүүллээ.

Завхан аймгийн Хүнс, хөдөө аж ахуйн газар, НҮБ-ийн Хүнс, хөдөө аж ахуйн байгууллагын дэмжлэгтэйгээр ХААИС-тай хамтран сумдынхаа мал зүйчдийг бог, бод малын ангилагч-шинжээчээр мэргэшүүлэх цогц сургалтад хамрууллаа. Сургалтыг онол, практик хосолсон хэлбэрээр 14 хоногийн хугацаатай зохион байгуулж, дадлагаа Эрдэнэхайрхан суманд таван төрлийн цөм сүрэг дээр хийлээ. Мөн зохиомол хээлтүүлгийн дадлагыг хийснээр мал зүйчид олон талын мэдлэг, мэдээлэлтэй болжээ.

Завхан аймагт мал зүйч мэргэжилтэн дутагдалтай байгаа. Тиймээс цаашид ХААИС-тай  хамтран  мал зүйчдийг бэлтгэхэд анхаарч ажиллах юм.  Ингэснээр орон нутагт мал аж ахуйн үйлдвэрлэлийг хөгжүүлэхэд тодорхой хувь  нэмэр оруулна гэлээ.

Мэргэжилтнүүд мал аж ахуйн үржлийн чанарыг сайжруулахад орчин үеийн шинэлэг арга барилуудыг ашиглах шаардлагатай. Тиймээс энэ удаагийн сургалт ихээхэн ач холбогдолтой болсныг онцоллоо.