Монгол Улсын 21 аймаг, нийслэлийн алслагдсан 2 дүүрэг, нийт 23 салбараар дамжуулан үндэсний хэмжээнд үйл ажиллагаагаа явуулдаг “Монголын хараагүйчүүдийн үндэсний холбоо”-ноос Завхан аймагт “Хандлагаа өөрчилж хамтдаа хөгжье” хоёр өдрийн сургалт, уулзалт хэлэлцүүлгийг амжилттай зохион байгууллаа.

 

Энэ жилийн “Дэлхийн цагаан таягтны өдөр”-ийг Завхан аймгийн Засаг дарга дэмжин хамтран ажиллалаа. Аймгийн хэмжээнд нийт 350 гаруй харааны бэрхшээлтэй иргэн байна.

 

“Хандлагаа өөрчилж хамтдаа хөгжье” уулзалт, хэлэлцүүлэгт Улиастай сумын Иргэдийн Төлөөлөгчдийн хурал, багийн Засаг даргын ажлын алба, Хөдөлмөр, халамжийн үйлчилгээний газар, ГБХЗХГ, Эрүүл мэндийн даатгал, Нийгмийн даатгал, Эрүүл мэндийн газар, БСУГ зэрэг холбогдох байгууллагуудын дарга, захирал, мэргэжилтнүүд, 24 сумын харааны бэрхшээлтэй иргэдийн төлөөлөл 88 хүн оролцлоо.

Сургалтаар МХҮХ-ны хэрэгжүүлж буй ажил, Сүхбаатар аймгийн салбар хорооны туршлага, Завхан аймгийн хараагүй иргэдэд чиглэсэн бодлого хөтөлбөртэй танилцаж, тулгамдаж буй асуудлаа хэлэлцэн, “Зөвлөмж” гаргалаа.

 

Сургалтын хоёр дахь өдөр аймгийн удирдлагуудтай санал солилцож хэлэлцүүлгээс гарсан “Зөвлөмж”-ийг талархалын хамт аймгийн Засаг дарга Д.Түвшинжаргалд гардуулан өгөв. Аймгийн Засаг дарга хөгжлийн бэрхшээлтэй иргэдээ бүхий л талаар үе шаттай дэмжин ажиллахаа илэрхийллээ.

 

 “Зөвлөмж”-д тусгасны дагуу Хөдөлмөр халамжийн үйлчилгээний газраас харааны бэрхшээлтэй иргэдэд сурч хөгжих, үйл ажиллагаагаа явуулах байрны асуудлыг шийдвэрлэж өгөхөөр болов. 

 

Мөн энэ үеэр Улиастай сумын Ерөнхий боловсролын гуравдугаар сургууль дээр хэрэгжиж буй төслийн үйл ажиллагаатай танилцаж, хүүхдийн харааны чадварын түвшинд үнэлгээ хийж, санал солилцлоо.

 

Энэхүү уулзалт, хэлэлцүүлгийг 2022 оны төсөв хэлэлцэхийн өмнө зохион байгуулсан нь “Зөвлөмж”-ийг үе шаттай хэрэгжүүлэхэд цагаа олсон арга хэмжээ болсныг цохон тэмдэглэв.