Аймгийн Засаг дарга Г.Өнөрбаяр Завханмандал сум дахь Багахайрханы аймаг дундын отрын бүс нутгийн нөхцөл байдалтай танилцав.

Улсын хэмжээн дэх аймаг дундын 9 бүс нутгийн нэг болох уг бүс нутагт энэ жил Ургамал, Дөрвөлжин, Завханмандал, Цэцэн-Уул, сумдын мал өвөлжинө.

Одоогоор энэ бүс нутагт хонин толгойд шилжүүлснээр 39857 толгой мал өвөлжүүлнэ гэсэн тооцоо гарсан. Малчид 11 дүгээр сарын 1-нээс малаа оторлож эхлэх юм.

Отрын бүс нутгийн айлууд өвөлжөөгөө бусдад түрээслүүлдэг нь бүс нутагт харьяалалгүй мал орж ирэх, бэлчээрийн маргаан үүсэх гол шалтгаан болж байгааг аймгийн Засаг дарга Г.Өнөрбаяр сануулж, энэ талаар сумдын удирдлагууд малчидтай зөвшилцөх шаардлагатай байгааг хэлэв.

Мөн отрын бүс нутагт ус цэг нэмж гаргах, малчдаас малын хөлийн татвар авах, хадлан тэжээл авах газраа хашаалж хамгаалах талаар чиглэл өгч, аймаг орон нутгаас шаардлагатай дэмжлэгүүдийг үзүүлнэ гэв.