Нэг цэгийн үйлчилгээний төв нь 2018 онд аймгийн Цагдаагийн газрын дэргэд хүчирхийллийн хохирогчдод үйлчилгээ үзүүлэх зорилгоор байгуулагдсан. Өнөөдрийн байдлаар нийт 299 хүнд 2343 хоногийн үйлчилгээг үзүүлээд байна. Үүний 182 нь хүүхэд, 117 нь насанд хүрэгчид байгаа юм. Тус төв нь хохирогчдод аюулгүй байдал, хүүхэд хамгаалал, нийгмийн ажил, сэтгэл зүй болон хууль эрхзүйн зөвлөгөө, эрүүл мэнд, боловсрол, өмгөөллийн үйлчилгээ, холбон зуучлах гэсэн чиглэлүүдээр үйлчилгээ үзүүлдэг.

"Нэг цэгийн үйлчилгээний төв"-ийн удирдлагын багийг аймгийн Засаг даргын орлогч Ц.Улам-Оргих ахлан ажиллаж байна. Тэрээр хурлыг нээж хэлсэн үгэндээ:

- Улс орон даяар хүүхэд хамгааллын асуудлыг нэгт тавьж, онцгой анхаарч байна. Завхан аймаг ч энэ бодлогыг баримтална. Хүүхдүүд зөвхөн гэр бүлийн орчинд биш, сургууль, цэцэрлэг, олон нийтийн орчинд ч хүчирхийлэлд өртөж байгааг бид анхаарч ажиллах шаардлагатай байна. Ямар ч асуудлаас нэн тэргүүнд хүүхдийн эрхийн асуудлыг тавих ёстойг онцлон хэллээ.

Хурлаар “Нэг цэгийн үйлчилгээний төв”-ийн тайлан, мэдээлэл, тулгамдаж буй асуудлуудтай танилцаж, цаашид хэрэгжүүлэх ажлуудаа ярилцлаа.