Англи улсаас гаралтай, 150 гаруй жилийн түүхтэй, дэлхий нийтийн боловсролын системд өндөр үр өгөөжтэй “Pearson” хөтөлбөр улсын хэмжээнд ерөнхий боловсролын зарим сургуулийн 5,6 дугаар ангид хэрэгжиж байна.

Тэгвэл энэхүү хөтөлбөрийг аймгийн Засаг дарга Г.Өнөрбаяр санаачлан бусад аймгаас түрүүлж, Завхан аймагтаа анх удаа хэрэгжүүлж эхэллээ.

Хөтөлбөрийн хичээл аймгийн хэмжээний ерөнхий боловсролын бүх сургуулийн 12 дугаар ангийн сурагчдад олон улсын стандартын дагуу сурах бичиг, цахим хосолсон хэлбэрээр хичээллэнэ.

Хөтөлбөр хэрэгжиж эхлэхтэй холбогдуулан Боловсролын ерөнхий газар, ”Pearson” хөтөлбөрийн мэргэжилтнүүд аймгийн ерөнхий боловсролын бүх сургуулийн англи хэлний багш нарт зөвлөн туслах, чиглүүлэх сургалтыг орлоо.

Сурагчдыг оношлох, явцын, сүүлийн үнэлгээ гэсэн шалгуураар үнэлж үр дүнг тооцох юм.

Хөтөлбөр хэрэгжсэнээр 12 дугаар ангийн сурагчид англи хэлний олон улсын стандартын хичээлийг судалж, элсэлтийн ерөнхий шалгалтандаа өндөр оноо авах боломж бүрдэх, цаашлаад гадаадын их дээд сургуульд элсэхэд дөхөм болох олон талын ач холбогдолтой.