Аймгийн Засаг Дарга Г.Өнөрбаяр болон холбогдох албаныхан Отгон суманд ажиллалаа.

Тус сумын 6 багт нийт 168 малчин өрх өвөлжиж байна. Одоогоор Баянбулаг, Буянт багт өвөлжилт хүндэрч, Завхан аймгийн Шилүүстэй, Алдархаан, Идэр, Баянхонгор аймгийн Гурванбулаг, Хүрээмарал, Говь-Алтай аймгийн Дэлгэр суманд 42,000 мал бүхий 32 малчин өрх отор хийж байна.

Отгон сумын Баянбулаг багийн Ар элстэй, Баян-Улаан, Өвөр элстэй хэмээх газар өвөлжиж буй Б.Лхагвасүрэн, Л.Энхсайхан, Я.Бямбаноровынд очиж, өвөлжилтийн нөхцөл байдалтай танилцав.

Энэ жил Отгон суманд цас их орж, зарим газартаа шуурч хатуурсан тул малчид өвсний дэмжлэг хүсэж, аймгийн нөөцөөс шийдвэрлэхээр болов.

Отгон сум 16,000 боодол өвс, 7.5 тонн тэжээл, 5 тонн улаанбуудай аюулгүйн нөөцдөө бэлтгэжээ. Гэсэн ч энэхүү нөөц нь малчдад хүрэлцэхээргүй байгааг сумын Засаг дарга Б.Бат-Оргил онцолж байлаа.