Японы Хүүхдийг Ивээх Сан “Денан төсөл”-ийн санхүүжилтээр 2025 оноос Завхан аймгийн Түдэвтэй суманд эрүүл мэндийн төсөл хэрэгжүүлж, иж бүрэн шинэ шүдний кабинетыг өнөөдөр буюу 2025 оны 4 дүгээр сарын 4-нд хүлээлгэн өглөө.
Шүдний кабинет байгуулснаар Түдэвтэй сумын иргэдээс гадна тойргийн Асгат, Сонгино, Баянтэс, Тэс, Нөмрөг, Баянхайрхан, Сантмаргац, Цэцэн-Уул зэрэг сумын 16 мянга гаруй иргэд, 0-18 насны 6,600 орчим хүүхэд амны хөндийн эрүүл мэндийн тусламж үйлчилгээ авах боломж бүрдэв.
"Денан төсөл"-өөр сумын эрүүл мэндийн төвүүдэд шүдний кабинет байгуулж, шаардлагатай тоног төхөөрөмж, аппарат хэрэгсэл, эм тариа авахад дэмжлэг үзүүлэх, эмч, ажилтнуудыг сургаж, чадавхжуулахаас гадна сурагчдын дунд эрүүл мэндийн клуб байгуулан эрүүл мэндийн боловсрол олгох сургалт, нийгмийн эрүүл мэндийг дэмжихэд чиглэсэн үйл ажиллагаа явуулж байгаа юм.
Японы Хүүхдийг Ивээх Сан АНУ-д төвтэй “Денан төсөл”-ийн санхүүжилтээр 2012 оноос Архангай аймгийн Тариат, Эрдэнэмандал суманд, 2022 оноос Говь-Алтай аймгийн Чандмань суманд эрүүл мэндийн төсөл хэрэгжүүлж байна.
Энэхүү арга хэмжээнд Японы Хүүхдийг Ивээх Сангийн Монгол дахь Суурин төлөөлөгч Л.Баян-Алтай, Завхан аймгийн Засаг даргын орлогч Д.Уужимсанаа,
Завхан аймгийн Засаг Даргын Тамгын Газрын дарга Т.Рэнчинванжил, Эрүүл мэндийн газрын дарга М.Үржинханд, эрүүл мэндийн төслийн ажилтан Б.Номин, Завхан аймаг дахь салбарын ажилтан П.Дөлгөөн, Б.Мягмарсүрэн болон бусад албаныхан оролцов.
2025-04-04 00:00:00
