Аймгийн Онцгой байдлын газарт 2025 оны 8 дугаар сарын 9-ний өдрийн 19 цагт Баянхайрхан сумын Төөнт багийн Хамар даваа гэдэг газарт ой хээрийн түймэр гарсан тухай дуудлага мэдээлэл ирсэн. Уг мэдээллийн дагуу аймгийн Засаг дарга Г.Өнөрбаяр аймгийн Онцгой комиссыг хуралдууллаа.
Ой хээрийн түймэр Баянхайрхан сумын төвөөс хойд зүгт 11 км-т, аймгийн төвөөс 250 км-т гарсан. Урьдчилсан байдлаар 800 гаруй га ой болон хээрийн талбай түймэрт автсан, хуурайшилт маш өндөр, салхины хурд 10 м/секунтээс дээш нэгэн чигт биш, ой дахь түймэр уулын хярд, хүн техник очих боломжгүй байдалтай байна. Түймэр гарсан газрын орчимд айл өрх байхгүй, түймэр урд зүг рүү чиглэж байна.
Аймгийн Онцгой комиссын хуралдаанаар Засаг дарга Г.Өнөрбаяр түймрийн голомт руу Засаг даргын орлогч Д.Уужимсанаагаар ахлуулсан бүрэлдэхүүнийг томиллоо. Мөн Тосонцэнгэл, Тэс, Улиастай, Сонгино сумдын Онцгой байдлын харьяа нэгжүүд болон мэргэжлийн анги салбар, Зэвсэгт хүчний 325 дугаар ангийн алба хаагчид болон тойргийн сумдаас хүн хүч гаргаж ажиллуулах, Түдэвтэй-Арц суурь чиглэлд авто зам тавьж буй компаниас техник хэрэгсэл гаргуулж ажиллахыг чиглэл болгов.
2025-08-10 00:00:00
